କିଛି ଛାଡ଼ି ଗଲେ କି ପଛରେ

 

କିଛି ଛାଡ଼ି ଗଲେ କି ପଛରେ

                                                                                     

     

ଡାକରା ଆସିଲେ ଯିବାକୁ ପଡିବ,

                                         କିଛି ନେବ ନାହିଁ ସାଙ୍ଗରେ

ମମତାର ଡୋରି ଛିଡିଯିବ ଦିନେ

                                         ସବୁ ରହିଯିବ ପଛରେ ।

ଆୟା ପାଖେ ଛାଡ଼ି କଅଁଳା ଶିଶୁକୁ

                                            ଅଫିସକୁ ଯେବେ ବାହାରେ

ପଚାରଇ ଆୟା ସବୁ ନେଇଛତ

                                                 ଛାଡ଼ିନାହଁ କିଛି ପଛରେ ।

ଯାହା ପାଇଁ ଖଟି ରୋଜଗାର କରେ

                                                ତାକୁତ ଛାଡ଼ିଲି ପଛରେ

ଚାବି ଆଉ ପର୍ସ ମୋବାଇଲ ଫୋନ

                                                   ଏ ସବୁକୁ କିଏ ପଚାରେ ।

ଝିଅ ବାହାଘର ସାରି କନ୍ୟା ପିତା

                                                 ମଣ୍ଡପ ଛାଡିବା ବେଳରେ

ଭଉଣୀ ପଚାରେ ଦେଖିନିଅ ଭାଇ

                                                   ଛାଡିଲ କି କିଛି ପଛରେ ।

ବାପ ଭାବୁଥାଏ ଝିଅ ଚାଲିଗଲା

                                                ବନ୍ଧନ ରହିଲା ପଛରେ

ବାକି ଯଦି କିଛି ରହିଲା ଜିନିଷ

                                                 ମୂଲ୍ୟହୀନ ଝିଅ ଆଗରେ ।

ଅବସର ଦିନ ସମ୍ବର୍ଦ୍ଧନା ପରେ

                                                     ପିଅନଟା ଆସି ପଚାରେ

ଟେବୁଲ ଡ୍ରୟର ଦେଖି ନିଅ ସାର

                                                      ରହିଲା କିଛି ପଛରେ ।

    ସାର ଭାବୁଥାନ୍ତି ପଚିଶ ବର୍ଷର ସ୍ମୃତି

                                                  ରହିଗଲା ପଛରେ

ଡାଏରୀ କଲମ ଚଷମାର ଖୋଳ

                                               ଏ ସବୁକୁ କିଏ ପଚାରେ ।

ପୁଅ ପାଠ ପଢି ଚାକିରୀ କରିଲା

                                                ରହିଗଲା ଆମେରିକାରେ

ବିଦେଶିନୀ ଝିଅ ବାହା ହୋଇଗଲା

                                                ରାଜି ହୋଇ ନିଜ ଇଛାରେ ।

ନାତି ଦେଖିବାକୁ ଆମେରିକା ଗଲେ

                                                 ପତିପତ୍ନୀ ଦୁହେଁ ପ୍ଲେନରେ

ପୁଅ ପଚାରୁଛି ଫେରିବା ବେଳରେ

                                           ବାବା କିଛି ଛାଡିଲ କି ପଛରେ ।

ସାରା ଜୀବନରେ ଅର୍ଜିଥିବା ଧନ

                                                  ପୁଅ ରହିଗଲା ପଛରେ

       ସାର୍ଟ ପ୍ୟାଣ୍ଟ ଜୋତା ଧୋତି ଓ ଗାମୁଛା

                                               ଏ ସବୁକୁ କିଏ ପଚାରେ ।

ବାପାଙ୍କର ଶବ ଦାହ କରିସାରି

                                               ଘରକୁ ଫେରିବା ବେଳରେ

ଲେଉଟି ଆସଇ ଜୁଇର ପାଖକୁ

                                            ପୁଅ ଲୁହ ନେଇ ଆଖିରେ ।

ପଚାରଇ ସାଙ୍ଗ ଛାଡ଼ିଲୁକି କିଛି

                                           କିଛି ରହିଗଲା ପଛରେ

ସବୁ ଚାଲିଗଲା ବାପାଙ୍କ ସାଥିରେ

                                            କଥା ରହିଗଲା ମନରେ ।

ଏବେବି ସମୟ ରହିଛି ହାତରେ

                                             ବାନ୍ଧ ସ୍ନେହ ପ୍ରେମ ରଜୁରେ

କିଏ ଜାଣେ କେବେ ଯିବାକୁ ପଡିବ

                                               ସବୁ ଛାଡ଼ି ଦେଇ ପଛରେ ।

                                                                                                                                            ଚିନ୍ମୟୀ ପ୍ରିୟଦର୍ଶିନୀ